ការសរសេរសារណាការគ្រប់គ្រងធនធានមនុស្ស(ជំពូកទី ៤) ​

ជំពូកទី ៤

ការសា្រវជ្រាវពីស្ថានភាពទូទៅរបស់សណ្ឋាគាររ៉េស៊ីដង់សុខាភ្នំពេញ

៤.១. ប្រវត្តិ និងស្ថានភាពទូទៅ របស់សណ្ឋាគារ រ៉េស៊ីដង់ សុខាភ្នំពេញ

៤.១.១. ប្រវត្តិរបស់សណ្ឋាគារ រ៉េស៊ីដង់ សុខាភ្នំពេញ

ក្រុមហ៊ុន សុខាត្រូវបានបង្កើតឡើងដោយអ្នកឧកញ៉ា បណ្ឌិត សុខ គង់។ ក្រុមហ៊ុនដំបូងគេ នៃក្រុមហ៊ុនសុខាគឺ ក្រុមហ៊ុនប្រេង ឥន្ធនៈសូគីមិចគ្រុប។ ហើយក្រោយៗមកទៀតដោយមានការ វិនិយោគ និងមានការរីកចំរើនបន្ទាប់មកក្រុមហ៊ុនសុខាបានពង្រីកការវិនិយោគ របស់ខ្លួនបន្ថែមទៀត ដោយបានធ្វើការបង្កើតនូវសណ្ឋាគារលំដាប់ ផ្កាយ ៥ មួយចំនួនដូចជា នៅជាប់ឆ្នេរសមុទ្រនៃ ក្រុងព្រះសីហនុឈ្មោះ សណ្ឋាគារ ឆ្នេរសុខា សណ្ឋាគារ សុខាអង្គររីសត នៅក្រុមសៀមរាប សណ្ឋាគារ ឋានសួគ៌បូកគោ នៅលើភ្នំបូកគោនៃខេត្តកំពត និងចុងក្រោយគេគឺសណ្ឋាគារ រ៉េស៊ីដង់  សុខាភ្នំពេញ ដែលស្ថិតនៅតំបន់ចុងជ្រោយចង្វា ទល់មុខព្រះបរមរាជាវាំង។

ការអភិវឌ្ឍន៍ផ្នែកទេសចរណ៍ជាចំនុចដ៏សំខាន់មួយ ដែលធ្វើឲ្យយើងមានការចាប់អារម្មណ៍ និងជំរុញឲ្យមានការអភិវឌ្ឍន៍បន្ថែមទៀត ហើយនៅក្នុងនោះផងដែរ វិស័យទេសចរណ៍ជាឧស្សាហ­កម្មមួយ ដែលកំពុងតែរីកដុះដាលយ៉ាងខ្លាំងហើយកំពុងស្ថិតក្នុងការវិវឌ្ឍន៍ខ្លួនយ៉ាងល្អប្រសើរ។ ក្រុមហ៊ុនសុខា អូតែលបានធ្វើការវិនិយោគ និងចូលរួមក្នុងការអភិវឌ្ឍន៍វិស័យទេសចរណ៍ដើម្បីឲ្យ មានការីកចំរើនកាន់តែប្រសើរជាងមុន ដូច្នេះហើយទើបក្រុមហ៊ុនសុខា អូតែល បានសំឡឹងឃើញនូវ សក្ដានុពលនៃតំបន់មួយចំនួន ដែលស្ថិតនៅជុំវិញខ្សែក្រវាត់ទីក្រុងភ្នំពេញ។

ដោយទទួលបានសិទ្ធិវិនិយោគពីរាជរដ្ឋាភិបាលកម្ពុជា  នៅថ្ងៃទី ៨ ខែសីហា ឆ្នាំ ២០០៨ ក្រុមហ៊ុនសុខា អូតែលបានបើកការដ្ឋានសាងសង់តំបន់ជ្រោយចង្វា នៃរាជធានីភ្នំពេញឲ្យកាន់តែ មានសោភណ្ឌភាពល្អប្រសើរថែមទៀត។ ការអភិឌ្ឍន៍នៅតំបន់នេះ ក្រុមហ៊ុនសុខា អូតែល បាន  រៀបចំហេដ្ឋារចនាសម្ព័ន្ធ ផ្លូវ សួនច្បារ ច្រាំងទន្លេ និងបានសាងសង់សណ្ឋាគារដ៏ប្រណិតលំដាប់ អន្តរជាតិខ្នាតផ្កាយ ៥ មួយនៅចន្លោះទន្លេរមេគង្គ និងទន្លេរសាប ទល់មុខចំនុចប្រសពនៃទន្លេ ទាំងបួនដែលសណ្ឋាគារដ៏ធំស្កឹមស្កៃនេះឈ្មោះថា  សណ្ឋាគារ រ៉េស៊ីដង់ សុខាភ្នំពេញ។

សណ្ឋាគារ រ៉េស៊ីដង់ សុខាភ្នំពេញ គឺជាសណ្ឋាគារ ដ៏ល្អឯកមួយក្នុងរាជធានីភ្នំពេញនាពេល បច្ចុប្បន្នដែលបង្កើតឡើងនៅថ្ងៃទី ៨ ខែ សីហា ឆ្នាំ ២០១៣ និងត្រូវបានបើកឲ្យដំណើរការ​ជាជំហានដំបូងក្នុងការបំរើសេវាកម្មជូនភ្ញៀវជាតិ និងអន្តរជាតិនៅថ្ងៃទី ០២ ខែ ធ្នូ ឆ្នាំ ២០១៤។  សណ្ឋាគារនេះមានកំពស់ ១៨ ជាន់ មានបន្ទប់ ៥៤៩បន្ទប់ ខុនដូ ១៩៥បន្ទប់ដែលបំពាក់ដោយ បរិក្ខារទំនើបៗ សាលប្រជុំធំទូលាយដែលអាចរៀបចំកិច្ចប្រជុំជាលក្ខណៈអន្តរជាតិ មានភោជនីដ្ឋាន ម្ហូបខ្មែរ អឺរុប ចិន ជប៉ុន កន្លែងហាត់ប្រាណ ម៉ាស្សា ស្ប៉ា បា ខារ៉ាអូខេ អាងហែលទឹក មានចំណត រថយន្ត ៣ជាន់ដ៏ធំទូលាយ និងកន្លែងស្នាក់នៅប្រណិត ១៩៥ មានបន្ទប់ប្រជុំធំទូលាយ ដែលគ្រប់  បន្ទប់ទាំងអស់សុទ្ធតែបំពាក់សំភារៈ ឧបករណ៍ទំនើប និងការតុបតែងប្រកបដោយភាពប្រណិត លំដាប់អន្តរជាតិ និងមានកន្លែងកំសាន្តប្រកបដោយផាសុខភាព។

សណ្ឋាគារសុខា គឺជាសណ្ឋាគារមួយដែលផ្ដល់នូវសេវាកម្មស្នាក់នៅ ដែលមានទីតាំងដ៏ល្អ ប្រសើរមួយពុំមានអ្នកណាដូច ហើយ​អាចមើលឃើញនូវទេសភាពទាំងមូល នៃរាជធានីភ្នំពេញភ្នើង­ពណ៌ដ៏ស្រស់ស្អាត នៃរាជាធានីភ្នំពេញនាពេលយប់ ក៍ដូចជាមើលឃើញនូវទន្លេរទាំង ៤ ទេសភាព​ដ៏ស្រស់ស្អាត ​នៃព្រះបរមរាជវាំងដែលសំឡឹងមើលពីចំងាយឃើញភាពល្អគន់ និងល្អឥតខ្ចោះរបស់​ព្រះបរមរាជវាំង។

ក. ទីតាំងភូសាស្ត្ររបស់សណ្ឋាគារ

សណ្ឋាគារ រ៉េស៊ីដង់ សុខាភ្នំពេញមានទីតាំងស្ថិតនៅផ្លូវកែវ​ ចិន្តា ភូមិមួយ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។

ខ. ផ្លាកសញ្ញារបស់សណ្ឋាគារ

៤.១.២. ទស្សនៈវិស័យ បេសកកម្ម សណ្ឋាគារ រ៉េស៊ីដង់ សុខាភ្នំពេញ

ក. ចក្ខុវិស័យ

ចក្ខុវិស័យរបស់សណ្ឋាគារ រ៉េស៊ីដង់ សុខាភ្នំពេញ គឺដើម្បីបានការទទួលស្គាល់ថាជា រមណីយដ្ឋាន និងសណ្ឋាគារដែលល្អប្រសើរជាងគេក្នុងប្រទេសកម្ពុជា។

ខ. បេសកកម្ម

បេសកកម្មរបស់សណ្ឋាគារ រ៉េស៊ីដង់ សុខាភ្នំពេញ គឺដើម្បីផ្ដល់នូវបទពិសោធន៍ផ្នែកបដិ សណ្ឋារកិច្ចដែលពិសេសជាងគេទាំងភាពប្រណិតនៃទីកន្លែង និងតាមរយៈការផ្ដល់នូវគុណភាពនៃ​សេវាកម្មក្នុងបរិយាកាសប្រកបដោយ ផាសុខភាព ភាពរាក់ទាក់បើកចំហ។ សណ្ឋាគារ រ៉េស៊ីដង់ សុខាភ្នំពេញនឹងប្រកាន់ខ្ជាប់ទៅនឹងគោលការណ៍ នៃការទទួលខុសត្រូវ និងទ្រទ្រង់បរិស្ថានស្រប ពេល ដែលយើងក៏នឹងផ្ដល់នូវប្រាក់ចំណេញយ៉ាងល្អប្រសើរទៅកាន់អ្នកវិនិយោគទន់របស់យើង។

គ. វប្បធម៌ការងារ

និយោជិតសណ្ឋាគារ រ៉េស៊ីដង់ សុខាភ្នំពេញ មិនត្រឹមតែចេះសហការក្នុងការងារប៉ុណ្ណោះទេ​ថែទាំងមានការគោរពគ្នាទៅវិញទៅមក ចេះយោគយល់អធ្យាស្រ័យគ្នា មានភាពស្មោះត្រង់ និងចេះ ជួយគ្នាទៅវិញទៅមកនៅពេលមានបញ្ហានៅក្នុងការងារ ជាពិសេសមានទំនៀមទំលាប់ល្អក៏ដូចជា  វប្បធម៌ការងារល្អៗដូចខាងក្រោម៖

-   គោរពពេលវេលា និងយកចិត្តទុកដាក់ធ្វើការងារ

-   មានទំនួលខុសត្រូវលើការងារ

-   គោរពតួនាទីភារៈកិច្ច

-   ចេះជួយគ្នាទៅវិញទៅមក និងចេះចែករំលែកការលំបាកគ្នា

-   ប្រឹងប្រែងធ្វើការងារអស់ពីសមត្ថភាព

-   គោរពនៅគោលការណ៍របស់សណ្ឋាគារ ដែលស្របទៅនឹងច្បាប់ការងារ

-   អនុវត្តយ៉ាងខ្ជាប់ខ្ជួនតាមគោលការណ៍នៃច្បាប់ និងបរិស្ថាន

-   ចេះលើកទឹកចិត្តគ្នាទៅវិញទៅមក

-   មិនប្រកាន់បក្សពួកនិយម

-   ចេះរៀនសូត្រពីគ្នាទៅវិញទៅមក

-   មានភាពជាដៃគូរល្អក្នុងការងារ

-   អនុវត្តភារៈកិច្ចត្រឹមត្រូវច្បាស់លាស់គ្រប់គ្រាន់ ​និងទាន់ពេលវេលា

-   ឲ្យតម្លៃខ្ពស់ទៅលើច្បាប់បញ្ញាតិនានាដែលក្រុមហ៊ុនបានចែង និងអនុវត្តយ៉ាងខ្ជាប់ខ្ជួន

-   រវាងអ្នកគ្រប់គ្រងថ្នាក់ខ្ពស់ ថ្នាក់កណ្តាល ថ្នាក់ទាប និងនិយោជិតផ្ទាល់ចេះគោរពគ្នា​ទៅវិញទៅមកហើយចេះយល់ទុកធុរៈ ស្គាល់ការលំបាក និងយល់ដឹងពីបញ្ហាគ្នាដោយប្រកានខ្ជាប់នូវ សុជីវធម៌ សីលធម៌ វិជ្ជាជីវៈ ជាពិសេសឲ្យតម្លៃគ្នា ប្រកបដោយភាពស្និទ្ធស្នាល

-   បង្កឲ្យមានការខិតខំប្រឹងប្រែង តស៊ូ អត់ធ្មត់ក្នុងការងារទាំងនិយោជក និងនិយោជិត​ដើម្បីឲ្យទទួលបាននូវប្រសិទ្ធភាព និងភាពជោគជ័យក្នុងការងារទាំងអស់គ្នា

-   មិនធ្វើឲ្យប្រាស់ចាកពីច្បាប់រដ្ឋ និងមិនបង្កភាពស្មុគស្មាញដល់សង្គមជាតិ។

(សូមមើលឧបសម្ព័ន្ធទំព័រ ក_{១ -} ក_៧)

៤.១.៣. រចនាសម្ព័ន្ធ

ក. រចនាសម្ព័ន្ធរបស់សណ្ឋគាររ៉េស៊ីដងសុខាភ្នំពេញ

·      អ្នកគ្រប់គ្រងថ្នាក់ខ្ពស់ (Top Manager)

·      អ្នកគ្រប់គ្រងថ្នាក់កណ្តាល (Middle Manager)

·      អ្នកគ្រប់គ្រងថ្នាក់ក្រោម (Fist Line Manager)

ការប្រើរចនាសម្ព័ន្ធរបស់សណ្ឋាគារ រ៉េស៊ីដង់ សុខាភ្នំពេញ គឺតាមខ្សែរយៈបណ្តោយពីថ្នាក់ ខ្ពស់ទៅថ្នាក់ទាបធ្វើបែបនេះ គឺដើម្បីឲ្យការធ្វើផែនការប្រកបដោយប្រសិទ្ធភាព និងភាពសក្ត័សិទ្ធក្នុង ការគ្រប់គ្រងដឹកនាំនិយោជិត។

+      គ្រប់គ្រងថ្នាក់ខ្ពស់ (Top Manager) ៖ អ្នកគ្រប់គ្រងថ្នាក់ខ្ពស់ គឺជាអ្នកបំពេញ​ការងារនៅលំដាប់ខ្ពស់ ​និងជាអ្នកទទួលខុសត្រូវលើជីវិតរបស់សណ្ឋាគារទាំងមូល និងជាអ្នកដែល​រៀបចំផែនការយុទ្ធសាស្រ្ត និងដាក់ចេញនូវផែនការសម្រាប់អនុវត្តនៅក្នុងសណ្ឋាគារដូចជា៖

- ការទទួលខុសត្រូវផ្នែកសម្របសម្រួលនិងដោះស្រាយបញ្ហារបស់ប្រធានផ្នែកនីមួយៗ

- រៀបចំការប្រជុំពិគ្រោះយោបល់ជាមួយប្រធានផ្នែកនីមួយៗ ដើម្បីដាក់ចេញផែនការ​យុទ្ធសាស្រ្ត

- ត្រួតពិនិត្យរបាយការណ៍ការងារ និងធ្វើការតម្រងទិស

- ធ្វើការទំនាក់ទំនងជាមួយនឹងបណ្តាលអ្នកវិនិយោគជាតិ ​​និងអន្តរជាតិព្រមទាំងដៃគូរ​សហការនានាលើវិស័យទេសចរណ៍ និងសណ្ឋាគារ

- ជាអ្នករៀបចំគម្រោងទាក់ទងការងារធំៗ ការធ្វើសេចក្តីសម្រេចចិត្តលើថវិកា និង​របាយការណ៍របស់សណ្ឋាគារទាំងមូល។

+      អ្នកគ្រប់គ្រងថ្នាក់កណ្តាល (Middle Manager) ៖ អ្នកគ្រប់គ្រងថ្នាក់កណ្តាលទទួល ខុសត្រូវលើការគ្រប់គ្រងនិយោជិត ឲ្យអនុវត្តការងារទៅតាមផែនការ និងតាមការបែងចែករបស់​អង្គភាពដាក់ចេញនូវ ផែនការសកម្មភាពធ្វើការតាមដាន និងត្រួតពិនិត្យសកម្មភាពនៃការអនុវត្តន៍ ការងាររបស់និយោជិត និងប្រធានផ្នែកនីមួយៗធ្វើជាការសម្របសម្រួលដោះស្រាយបញ្ហាដែលកើត​មានចំពោះនិយោជិត ជួយជម្រុញឲ្យការអនុវត្តន៍ការងារសម្រេចទៅតាមផែនការដែលអង្គភាពដាក់​ចេញ និងរបាយការណ៍បញ្ជូនទៅអ្នកគ្រប់គ្រងថ្នាក់ខ្ពស់។

អ្នកគ្រប់គ្រងថ្នាក់ក្រោម (Fist Line Manager)   ការទទួលខុលត្រូវរបស់អ្នកគ្រប់គ្រង​ថ្នាក់​ក្រោម គឺធ្វើការគ្រប់គ្រងដោយផ្ទាល់ទៅលើនិយោជិតដែលជាផ្នែកប្រតិបត្តិរបស់ខ្លួនដើម្បីដឹកនាំ​សកម្មភា​ពអនុវត្តការងារនៅក្នុងតំបន់គោលដៅដែលខ្លួនទទួលខុលត្រូវក្នុងការគ្រប់គ្រងពត៌មាន និង គោរពទៅតាមបទបញ្ជារថ្នាក់លើនឹងត្រូវបានធ្វើការត្រួតពិនិត្យដោយអ្នកគ្រប់គ្រងថ្នាក់កណ្តាល  និង ទទួលខុសត្រូវដូចជា គ្រប់គ្រងនិយោជិត រៀបចំរបាយការណ៍ប្រចាំថ្ងៃ ប្រចាំសប្តាហ៍ និងប្រចាំខែ ការវាយតម្លៃ និងតាមដានសកម្មភាពការអនុវត្តន៍ការងាររបស់និយោជិត ប្រមូលទិន្នន័យរក្សាទុក​ទិន្នន័យធ្វើជាជំនួយការ និងជាអ្នកសម្រប់សម្រួល ជាអ្នកចរចារទៅដល់និយោជិតថ្នាក់ក្រោមព្រម​ទាំងធ្វើជាអ្នកទំនាក់ទំនងសកម្មភាពការងារ ដែលពាក់ពន្ធ័កម្លាំងសមត្ថភាពនិយោជិត ពង្រឹងការ​អនុវត្តការងារ និងធ្វើទំនាក់ទំនងជាមួយអ្នកគ្រប់គ្រងផ្សេងៗទៀតនៅក្នុងអង្គភាព ​ដើម្បីផ្តល់ពត៌មាន​ឲ្យគ្នាទៅវិញ​ទៅមក។