ការទិញដីទុកលក់ ជារបររកស៊ីមួយដែលត្រូវប៉ាន់ខ្លាំង ដោយសារតែរបរនេះផ្ដល់ផលចំណេញច្រើនសន្ធឹកសន្ធាប់។ 💰
យ៉ាងណាមិញ មិនមែនឱ្យតែមានលុយទិញដីទុកលក់ ដឹងតែចំណេញ កាក់កបគ្រប់ពេលនោះទេ។ ហេតុនេះ មុននឹងសម្រេចចិត្តទិញដីទុកលក់ គួរពិចារណាចំណុចមួយចំនួនខាងក្រោមនេះសិន៖
1️⃣ ប្រភពលុយដែលយកទៅទិញដី
ទិញដីនេះហើយ ជារបរត្រូវការដើមទុនច្រើនសន្ធឹក។ ហើយមិនមែនទិញថ្ងៃនេះ អាចលក់ចេញស្អែក មើលឃើញលុយចំណេញភ្លាមៗនោះទេ។ ដីខ្លះត្រូវប៉ាន់ អាចលក់ចេញលឿន តែដីខ្លះទៀតអាចប្រើពេលដល់៥ ទៅ១០ឆ្នាំ អាចបណ្ដាលឱ្យលុយយើងកប់ក្នុងដីនេះ។ បើអ្នកប្រើប្រាស់កម្ចីធនាគារ ឬលុយបង្វិលអាជីវកម្មផ្សេងៗ ត្រូវពិចារណាឱ្យច្បាស់លាស់។
2️⃣ ប្រភេទ និងសក្ដានុពល
មុនទិញមួយកន្លែងៗ ក៏ត្រូវដឹងពីប្រភេទដីដែរ ត្រូវដឹងថាតើទិញដីប្រភេទណាបានចំណេញ។ ជាទូទៅ ដីត្រូវបានបែងចែកជា ៤ ប្រភេទធំៗ រួមមាន ដីកសិកម្ម ដីសម្រាប់ទេសចរណ៍ ដីសម្រាប់ឧស្សាហកម្ម និង ដីសាងសង់លំនៅឋាន។ ដីទាំង៤យ៉ាងនេះ មានសក្ដានុពលផ្សេងៗគ្នា តែអ្នកគួរគិតគូរទៅតាម ទីតាំង សកម្មភាពសេដ្ឋកិច្ចនៅជុំវិញ ស្ថានភាពទីផ្សារ ដើម្បីស្វែងរកដីដែលឆាប់មានការអភិវឌ្ឍ មានចរន្តមនុស្សរស់នៅចេញចូលចរាចរណ៍ច្រើន ទើបងាយស្រួលក្នុងការលក់ចេញ បានចំណេញច្រើន។
3️⃣ ទីតាំងភូមិសាស្ត្រដី
នេះជាចំណុចសំខាន់មួយ ព្រោះទោះតម្លៃអាចក្រោមទីផ្សារ តែទីតាំងមិនសមប្រកបក៏ពិបាកលក់ចេញដែរ។ ក្នុងការជ្រើសរើសទីតាំងដីដែលល្អ និងត្រូវប៉ាន់គួរមើលលើចំណុចមួយចំនួនដូចជា
🔹 ទីតាំងនៅទីប្រជុំជន ឬតំបន់ដាច់ស្រយាល?
🔹 មានប្រព័ន្ធទឹកភ្លើងរដ្ឋទៅដល់ទេ?
🔹 មានប្រព័ន្ធផ្លូវថ្នល់ និងប្រព័ន្ធរំដោះជំនន់ទឹកភ្លៀងទេ?
🔹 ឧស្សាហ៍កើតមានគ្រោះធម្មជាតិទេ?
ត្រង់ចំណុចនេះអ្នកអាចស្វែងរកជំនួយប្រឹក្សាយោបល់ពី អ្នកជំនាញការផ្នែកអចលនទ្រព្យបាន។
4️⃣ លិខិតស្នាមគ្រប់គ្រាន់
ឯកសារផ្លូវច្បាប់ជាអ្វី កាន់តែត្រូវប្រុងប្រយ័ត្ន និងយកចិត្តទុកដាក់។ អ្នកអាចទុកចិត្តថា ដីមួយកន្លែងស្របច្បាប់អាចទិញ បានលុះត្រាតែដីនោះមានឯកសារគ្រប់គ្រាន់ដូចជាប្លង់រឹង (ចុះបញ្ជីរួច) ឬប្លង់ទន់ (មិនទាន់ចុះបញ្ជី) ឯកសារបង់ពន្ធ និងកិច្ចសន្យាទិញ-លក់។ ឯកសារទាំងនេះចាំបាច់ទទួលស្គាល់ និងចេញដោយអាជ្ញាធរមានសមត្ថកិច្ច រួមមានខាងពន្ធដារ ការិយាល័យសុរិយោដី សាលាឃុំ-សង្កាត់-ស្រុកជាដើម។
ចំណុចខាងលើជាជំនួយស្មារតីដល់អ្នក ដែលអាចជួយឱ្យអ្នកមានបម្រុងប្រយ័ត្នខ្ពស់ ក្នុងដំណើរការទិញដីទុកលក់យកចំណេញរបស់អ្នក៕
Comments
Post a Comment